Fəridə Kazımlı

Açar sözlər: ali təhsil, inteqrasiya, Bolonya sistemi, BMT, xaricdə təhsil, texnologiya, intellekt

Fəridə Elçin qızı Kazımlı

AZƏRBAYCAN ALİ TƏHSİL SİSTEMİNİN DÜNYA ALİ TƏHSİL MƏKANINA   İNTEQRASİYASI: MÜASİR ÇAĞIRIŞLAR VƏ TƏLƏBLƏR

Xülasə. Məqalədə ölkəmizin ali təhsil sisteminin inkişaf parametrləri içərisində yer alan beynəlxalq müstəviyə inteqrasiya və müsbət təcrübənin öyrənilməsi təhlil edilir. İlk öncə beynəlxalq təşkilatların bu isti- qamətdə atdıqları nəzəri və praktiki addımlar qeyd olunur. Azərbaycanda dövlət səviyyəsində ali təhsilin inkişafına dəstək meyarları araşdırılır. Həmçinin, beynəlxalq təhsil sisteminə keçidin müsbət və mənfi tərəfləri, Azərbaycanın qəbul etdiyi beynəlxalq təhsil standartları haqqında məlumat verilir.

Qlobal mühitdə təhsil sisteminin iqtisadiyyata, geostrateji mühitə və ölkəmizin beynəlxalq nüfuzuna təsirinin araşdırılması böyük əhəmiyyət kəsb edir. Belə ki, müxtəlif sahələr üzrə ixtisaslı kadrların hazırlan- masında tələb və təklifin müəyyən edilməsi, təhsildə kadr hazırlığı siyasəti, onun pedaqoji aspektləri böyük ölçüdə ölkənin gələcək inkişafına təsir göstərir. Azərbaycanın sahib olduğu təbii sərvətlərə sahib olmayan bir sıra ölkələrin yüksək inkişaf göstəricilərinin məhz təhsil və innovasiya üzərində qurulduğu qeyd edilməlidir. Texnologiya inqilabının sənaye inqilabını üstələdiyi bir dövrdə əl əməyi və avtomatlaşdırılmış əmək mühiti yerini artıq daha modern bir mühitə - süni intellektin inkişafına və smart texnologiyaların tətbiqinə verməkdədir. Dünya əhalisinin sayı artdıqca ölkələrin içməli su və ərzaq siyasəti, təbii resurslardan səmərəli və ekoloji cəhətdən təmiz istifadə prinsipləri məhz peşəkar mütəxəssislər sayəsində mümkün olur. Məqalədə Azərbaycanın inteqrasiya siyasəti yürütdüyü beynəlxalq təhsil sistemlərinin səmərəliliyi və ortaq mexanizm yolları da araşdırılmaqdadır.