Təranə Sadıqova

Açar sözlər: məktəbəqədər, uşaq, sosial, inkişaf, tərbiyə, oyun, fəaliyyət, tərbiyəçi

Təranə Buta qızı Sadıqova

MƏKTƏBƏQƏDƏR YAŞLI UŞAĞIN SOSİAL İNKİŞAFINDA OYUNUN ROLU

Xülasə. Məktəbəqədər dövr uşağın psixi inkişafı və şəxsiyyətinin formalaşmasında mühüm rol oynayır. Bu baxımdan oyundan istifadənin imkanları genişdir. Oyun uşaqların hərtərəfli inkişafında, o cümlədən onların sosial fallığının formalaşdırılmasında mühüm rol oynayır. Məktəbəqədər yaşlı uşaqların sosial fəallığı dedikdə, onun rəngarəng fəaliyyətinin məcmusu nəzərdə tutulur. Sosial fəallıq uşağın müxtəlif fəaliyyətində ifadə olunur: yeni biliklərin qazanılmasına tələbatda; didaktik oyun prosesində əqli vəzifələrin yerinə yetirilməsi zamanı biliklərdən səmərəli və müstəqil istifadə etmək bacarığında (əşya və hadisələrdə özünəməxsus cəhətləri tapmaq, düzgün əqli nəticə çıxarmaq); fəhmlilik, hazırcavablıq, müşahidəçilikdə; Vətənə məhəbbətdə, yaşıdları və yaşlılarla ünsiyyət prosesində xeyirxahlıqda; əşyalara, oyun materialına qayğıkeş münasibətdə və s.

Uşaqların qarşısında oyunun məzmun və qaydasının dəqiq açılması qaydalı oyunlara pedaqoji rəhbərliyin mühüm şərtidir. Oyundan təlim-tərbiyə vasitəsi kimi istifadə etmək üçün tərbiyəçi ona düzgün pedaqoji rəhbərlik etməlidir. Oyuna rəhbərliyi elə təşkil etmək lazımdır ki, o uşağın fallığının və müstəqilliyinin inkişafına, onların özünütəşkilinə təsir etsin.