Cavadov İlham Ağaqardaş oğlu 02 yanvar 1979-cu ildə Salyan rayonunun Xalac kəndində anadan olub, 01 sentyabr 1986-cı ildə birinci sinfə gedib, 1996-cı ildə İ.İbrahimov adına Xalac-1 kənd orta məktəbini fərqlənmə attestatı ilə bitirib.

1996-cı ildə Azərbaycan Dövlət Pedaqoji Universitetinin Mühəndis pedaqoji fakültəsinə qəbul olunub, 2000-ci ildə həmin fakültəni fərqlənmə diplomu ilə bitirib.

2000-ci ildə Azərbaycan Dövlət Pedaqoji Universitetinin Ümumi pedaqogika, pedaqogikanın və təhsilin tarixi ixtisası üzrə magistraturasına qəbul olunub, 2002-ci ildə magistratura təhsilini fərqlənmə diplomu ilə bitirib.

2002-ci ildə Azərbaycan Respublikasının Təhsil Problemləri İnstitutuna Ümumi pedaqogika, pedaqogikanın və təhsilin tarixi ixtisası üzrə əyani doktoranturaya qəbul olunub, 2006-cı ildə “Ümumtəhsil məktəblərində monitorinq və qiymətləndirmə üzrə işin sistemi” mövzusunda namizədlik dissertasiyası müdafiə edərək Azərbaycan Respublikasının Prezidenti yanında Ali Attestasiya Komissiyasının 3 aprel 2007-ci il tarixli (protokol №12-k) qərarı ilə pedaqoji elmlər namizədi alimlik dərəcəsi alıb.

2011-ci ildə Azərbaycan Respublikasının Təhsil Problemləri İnstitutuna Ümumi pedaqogika, pedaqogikanın və təhsilin tarixi ixtisası üzrə elmlər doktoru proqramı üzrə doktoranturaya qəbul olunub, hazırda “Ümumtəhsilin keyfiyyətinin idarəolunmasının pedaqoji əsasları” mövzusunda doktorluq dissertasiyası üzərində işləyir.

Azərbaycan Respublikasının Prezidenti yanında Ali Attestasiya Komissiyasının 22 fevral 2012-ci il tarixli (protokol №07-k) qərarı ilə ümumi pedaqogika, pedaqogikanın və təhsilin tarixi ixtisası üzrə dosent elmi adı alıb.

01 fevral 2006-cı il tarixindən Azərbaycan Respublikasının Təhsil Problemləri İnstitutunda böyük elmi işçi, 05 yanvar 2007-ci il tarixdən aparıcı elmi işçi, 10 mart 2009-cu il tarixdən 12 may 2014-cü il tarixinədək institutun Kurikulum Mərkəzində aparıcı elmi işçi-koordinator, 12 may 2014-cü il tarixdən 22 noyabr 2018-ci il tarixinədək şöbə müdiri, 22 noyabr 2018-ci il tarixdən 28 fevral 2023-cü il tarixinədək Elmi pedaqoji tədqiqatlar Mərkəzinin direktoru vəzifəsində işləyib. Hazırda institutun direktor müavini vəzifəsində çalışır.

Pedaqogika üzrə fəlsəfə doktoru, dosent Cavadov İlham Ağaqardaş oğlu Təhsildə monitorinq və qiymətləndirməyə, təhsilin keyfiyyətinin idarəolunmasına, şagird nailiyyətlərinin qiymətləndirilməsinə və ümumtəhsil məktəblərində tədrisin təşkilinə dair 4 metodik vəsaitin, 35 qəzet və jurnal məqaləsinin, 6 tezisin müəllifidir. Yüksək ixtisaslı elmi-pedaqoji kadr hazırlığında fəal iştirak edir. Onun rəhbərliyi ilə ümumi pedaqogika, pedaqogikanın və təhsilin tarixi ixtisası üzrə 5 nəfər fəlsəfə doktoru proqramı üzrə təhsil alır, 2 nəfər təhsilini müvəffəqiyyətlə başa vurmuş, sənədlərini müdafiəyə təqdim etmişdir.

İ.A. Cavadov 2021-ci ildə ölkə başçısı tərəfindən “Tərəqqi” medalına layiq görülmüş, 2011 və 2023-cü illərdə respublika Elm və Təhsil Nazirliyi, 2024-cü ildə Yeni Azərbaycan Partiyası Səbail rayon təşkilatı tərəfindən “Təşəkkürnamə” ilə təltif olunmuşdur.

Ümumi təhsildə məzmun və qiymətləndirmənin, inklüzivliyin, müəllimlərin işə qəbulu və fəaliyyətinin qiymətləndirilməsinin öyrənilməsi məqsədilə 2015-ci ilin 26-30 aprel, 07-12 iyun, 2023-cü ilin 19-25 mart tarixlərində Fransa Respublikasına təşkil olunmuş tədris səfərində, 2022-ci ilin 11-15 may tarixlərində Türkiyə Respublikasında beynəlxalq təhsil forumunda iştirak etmişdir.

2008/2009, 2009/2010, 2010/2011-ci tədris illərində Azərbaycan Müəllimlər İnstitutunda 0,5 ştat əvəzçi müəllim vəzifəsində, 2022/2023, 2023/2024-cü tədris illərindən isə, Azərbaycan Dövlət Pedaqoji Universitetində 0,5 ştat əvəzçi dosent vəzifəsində çalışır.

Təhsil Nazirliyi tərəfindən təşkil olunan Təhsildə İnkişaf və İnnovasiyalar üzrə qrant müsabiqəsinin ekspert komissiyasının (I-VI qrant müsabiqələrinin) üzvü olmuşdur.

Azərbaycan Respublikası Elm və Təhsil Nazirliyinin təsisçisi olduğu “İbtidai məktəb və məktəbəqədər təhsil” elmi-metodik jurnalın, “Azərbaycan məktəbi” elmi-nəzəri pedaqoji jurnalın redaksiya şuralarının üzvü, Azərbaycan Respublikasının Təhsil İnstitutunun təsisçisi olduğu “Elmi əsərlər” məcmuəsinin baş redaktor müavinidir.

2014-cü ildən Yeni Azərbaycan Partiyasının üzvü, 2022-ci ildən isə Yeni Azərbaycan Partiyası Səbail Rayonu “Zərifə Əliyeva 96” Ərazi Partiya Təşkilatının sədridir.