Pərvanə İntiqam qızı Hüseynova

AİLƏ ŞƏXSİYYƏTİN İNKİŞAFINDA SOSİAL-MƏDƏNİ MÜHİT KİMİ

Xülasə. Müasir dövrdə insanın sosiallaşmasında əsaslı rola malik olan faktorlardan biri ailədir və uşaq dün­yaya ilk dəfə ailədə göz açır. N. Gəncəvi ailəni uşağın düşdüyü ilk cəmiyyət adlandırır və uşaqlar yaxşı və pis xüsusiyyətləri öz ailəsindən‚ valideynlərindən götürürlər. Hər bir ailə‚ istər pedaqoji‚ istər psixoloji‚ ist­­­ər sosial aspektdən‚ özündən sonra gələn ailələr üçün örnək rolunu oynayır və burada böyüyən uşaqlar öz va­lideynlərinə məxsus olan ailə modelini gələcək ailə həyatında təkrar edir.

Klassik yanaşma ailəni sosial institut kimi müəyyən edir və onun əsasını təşkil edən nikah kişi ilə qa­dın arasındakı sosial münasibətlərin formasıdır. Nikah‚ eyni zamanda‚ cinsi həyatı tənzimləyir‚ ailə daxilində ər-arvad münasibətlərini‚ onların hüquq və vəzifələrini‚ uşaqların tərbiyəsinin məqsədini müəyyən edir. Azərbaycan Respublikasının Konstitusiyası təknikahlığı qanuni yolla təsbit etmişdir.

Cəmiyyətin sosial özəyi olan ailə öz mənəvi mədəniyyəti və dəyərləri ilə cəmiyyətin sosial-ictimai mən­zərəsini yaradır. O öz mədəni səviyyəsinə uyğun şəxsiyyət yetişdirir və onun üzvləri bir-biri ilə məişət bir­liyi‚ qarşılıqlı məsuliyyət və yardım‚ ümumi ailə büdcəsi‚ valideynlər arasında və valideynlərlə uşaqlar ara­sındakı münasibətlər sistemi vasitəsilə bağlı olurlar.

Açar sözlər: müasir ailə‚ ailə münasibətləri‚ müasir ailənin problemləri‚ ailə münaqişələri