Hümeyir Hüseyn oğlu Əhmədov 1958-cu ildə Bakı şəhərində anadan olmuşdur.

1979-cu ildə Azərbaycan Dövlət Pedaqoji İnstitutunun (hazırda ADPU) riyaziyyat fakultəsini fərqlənmə diplomu ilə bitirmiş, təyinatla 1979-1984-cü illərdə Azərbaycan SSR-nin  Dəmir yolu orta  məktəblərində riyaziyyat, fizika və əmək müəllimi, C.Naxçıvanski adına hərbi təmaüllü orta məktəbdə tərbiyəçi-müəllim, A.S. Makarenko adına 12 nömrəli rus dili təmaüllü internat məktəbində riyaziyyat müəllimi kimi əmək fəaliyyətini davam etdirmişdir. 1984-1987-ci illərdə Azərbaycan Elmi-Tədqiqat Pedaqoji Elmlər İnstitutunun (Təhsil Problemləri İnstitutu) aspiranturasında əyani təhsil almış, 1988-ci ildə 13.00.01 pedaqogika nəzəriy­yəsi və tarixi ixtisası üzrə namizədlik dissertasiyasını müdafiə edərək, kiçik elmi işçidən baş elmi işçi vəzifəsinədək yüksəlmiş, 1992-ci ildə SSRİ Ali Attestasiya Komissiyası tərəfindən böyük elmi işçi elmi dərəcəsi verilmişdir. 2000-ci ildən hal-hazıra kimi Azərbaycan Respublikasının Təhsil Institutunda elmi-pedaqoji kadr hazırlığı şöbəsinin müdiri vəzifəsində işləyir.

H.H. Əhmədov pedaqogika üzrə elmlər doktoru, professor, Rusiya Dövlət Təhsil Akademiyasının xarici üzvü, Rusiya Təhsil Akademiyasının əməkdar elm və təhsil xadimidir.

     Təhsilin hüquqi nizamlanmasının elmi əsaslarını tədqiq  etmiş, ölkədə ilk dəfə olaraq ali məktəblər üçün “Təhsil hüququ” fənninin proqramını və dərsliyini hazırlamışdır.  Bundan başqa, ali məktəblər üçün iki dərs vəsaitinin həmmüəllifi, kolleclər üçün ilk dəfə Azərbaycan dilində “Pedaqogika” proqramı, dərs vəsaiti və dərsliyini hazırlamış, orta məktəblərin V-VIII sinifləri üçün hazırlanan “Əmək təlimi” və II-IX sinif şagirdləri üçün “Texnologiya” dərslikləri, dərs vəsaitləri, müəllim üçün metodik vəsaitlərin, həmçinin iş dəftərlərinin həmmüəllifidir.

H.H. Əhmədovun 10 monoqrafiyası Azərbaycan, rus və ingilis dillərində müxtəlif ölkələrdə nəşr olunmuşdur. Ümumilikdə ümumtəhsil məktəblər üçün iki adda, kolleclər ünün bir adda, ali təhsil müəssisələri üçü dörd adda dərslik və dərs vəsaitlərinin müəllifi və həmmüəlifidir.

Müxtəlif illərdə bir sıra ali və orta ixtisas məktəblərində əvəzçiliklə dərs demişdir. O, Azərbaycan və ingilis dillərində çap olunmuş “Azərbaycan Təhsilinin İnkişaf Strategiyası” adlı irihəcmli monoqrafiyasında ölkəmizdə təhsil siyasətinin istiqamətlərinin və təhsil sisteminin əsaslı surətdə yeni­dən qurulması prosesində baş vermiş sosial-pedaqoji hadisələrin mürəkkəb­liyi, onun dərin ziddiyyətlərini ətraflı təhlil etmiş, islahatların qaçılmazlığı və labüdlüyünü  əsaslanmışdır.

H.H. Əhmədov 1985-ci ildən SSRİ PEA-nın “Məktəb və pedaqogika tarixi” üzrə problem şurasının üzvü, 2003-cü ildən  ABŞ-ın Minnesota Universitetinin “Təhsilin strateji plan­laş­dırılması üzrə Koordinasiya Şurasının” üzvü və fəxri professorudur. O, 2006-cı ildə “Azərbaycan Respublikası qabaqcıl təhsil işçisi” döş nişanı ilə təltif olunmuşdur. 2008-ci ildə ona  “YUNESKO müəllimi” fəxri adı olan sertifikat verilmişdir (Kazan şəhəri). 2008-ci ilin sentyabr ayında Rusiya Federasiyasının üçüncü dərəcəli “Долг и честь” ordeni ilə təltif edilmişdir. 2009-cu ildə Rusiya Federasiyası Elm və Təhsil  nazirliyinin pedaqoji elmlərin inkişafında xidmətinə görə “K.D. Uşinski” adına medalla təltif olunmuşdur. 2017-ci ildə RTA-nın “Əməkdar elm və təhsil xadimi” fəxri adın layiq görülmüşdür.  ATİAHİ RK-nin100 illiyi medalı - 2021 (№2643), Azərbaycan Respublikası Prezidentinin 05.10.2021-ci il tarixli 2942 nömrəli Sərəncamı ilə “Tərəqqi” medalı (I-6259) ilə təltif olunmuşdur. 

  2011-ci ildə “Qloballaşma şəraitində Azərbaycan Respublikasında ali təhsilin modernləşdirilməsi” mövzusunda doktorluq dissertasiyasını müdafiə etmisdir. Azərbaycan Respublikasının Prezidenti yanında AAK-nın müvafiq qərarı ilə ona pedaqogika üzrə elmlər doktoru elmi dərəcəsi, 2017-ci ildə isə professor elmi adı verilmişdir.

2004-cü ildən “Pedaqoqlar sülh və qarşılıqlı anlaşma uğrunda” Beynəlxalq hərəkatının Azərbay­can təşkilatının üzvü, 2005-ci ilin yanvar ayında Moskva şəhərində Pedaqoji və Sosial Elmlər Akademiyasının müxbir üzvü, 2007-ci ilin aprel ayında isə həqiqi üzvü, 2006-cı ilin aprel  ayında Rusiya Dövlət Təhsil Akademiyasının xarici üzvü (https://rao.rusacademedu.ru/akademiya/inostrannye-chleny-rao), 2007-ci ilin noyabr ayında Pedaqoji Təhsilin Beynəlxalq Elmlər Akademiyasının həqiqi üzvü (akademiki) seçilmişdir.

2008-ci ilin fevralında əsası Ulu Öndər Heydər Əliyev tərəfindən qoyulan Azərbaycan Respublikası “Təhsil şurası” ictimai birliyinin idarə heyətinin üzvü seçilib. “Qızıl qələm” media mükafatı laureatıdır.

2008-ci ilin dekabrında Rusiya Hüquq Elmləri Akademiyasının, 2012-ci ilin iyununda isə Rusiya Federasiyasının Təhsilin İnformatlaşdırılması Akademiyasının həqiqi üzvü (akademiki) seçilmişdir.

2017-ci ildə Rusiya Təbiətşünaslıq Akademiyasının müxbir üzvü,  2020-ci ildə isə həqiqi üzvü (akademiki) seçilib (https://www.famous-scientists.ru/16230/).

          Hümeyir Hüseyn oğlu Əhmədov Azərbaycan Respublikası Prezidenti yanında AAK-ın  Təhsil Problemləri İnstitutunda yaratdığı (N 02.191 və B/D 02.191), ADPU-nun nəzdində fəaliyyət göstərən (FD 02.061 və B/D 02.061), həmçinin ADPU-nun nəzdində fəaliyyət göstərən (FD 2.15) dissertasiya şuralarının üzvü olmuşdur. ARTİ-nin “Elmi əsərlər”,  TN-nin “Azərbaycan məktəbi”, “Kurikulum”, “Pedaqogika”, Bakı Qızlar Universitetinin “Elmi əsərlər” jurnallarının, həmçinin Moskvada nəşr olunan “Право и жизнь”, RF AAK-nın tövsiyə etdiyi siyahıya daxil olan “Муниципальное образование: инновации и эксперимент”,  “Инновационные проекты и программы в образовании” və “Образование. Наука. Научные кадры”, həmçinin  İndeksli “Revista Genero e İnterdisciplinaridade” jurnallarının redaksiya heyətinin üzvüdür.

        Azərbaycanın elm və təhsil sahəsində qazandığı nailiyyətləri xarici ölkələrdə keçirilən elmi sipozium və konfranslarda layiqincə təmisil və təbliğ  edir. 2018-ci ildə Fransanın Paris şəhərində keçirilən kitab sərgisində “The Strategy of Education Development in Azerbaijan” monoqrafiyası və ali təhsil müəssisələrinin bakalavr səviyyəsi üçün yazdığı “Pedaqogika”  dərsliyi “Qızıl medal”la mükafatlandırılmışdır.

        Onun elmi rəhbəri olduğu bir nəfər dissertasiya müdafiə edərək fəlsəfə doktoru elmi dərəcəsi almışdır.

500-dən artıq   elmi əsərin, 10 monoqrafiya, kitab, dərslik, dərs vəsaiti, metodik vəsait  və proqramın müəllifidir. Ümumtəhsil, kollec və ali təhsil müəssisələri   üçün dərslik və dərs vəsaitinin müəllifi və həmmüəlifidir.