Fəridə Xudiyeva

TƏHSİLİN İDARƏEDİLMƏSİNDƏ DÖVLƏT-BİZNES TƏRƏFDAŞLIĞI SİSTEMİNİN YARADILMASININ MÜHÜM ASPEKTLƏRİ

Xülasə. Qloballaşan dünyada iri şirkətlər, biznes dairələri təhsil müəssisələri, xüsusən də uni­ver­si­tet­lə­rə ciddi maraq göstərirlər. Ölkə iqtisadiyyatının davamlı inkişafının təmin olunması üçün daha səriştəli, inno­va­tiv təfəkkürlü işçilərə tələbatın artması nəticəsində biznes dairələri təhsil müəssisələri ilə əməkdaşlıq mü­na­sibətlərinin qurulmasında maraqlıdır. Bu faktora çox ciddi əhəmiyyətin verildiyi ölkələrdə (ABŞ, Böyük Bri­taniya, Almaniya, Çin, Yaponiya, Cənubi Koreya) biznes qurumları universitetlərdə tədris prosesinə, pe­da­qoji prosesə fəal müdaxilə edirlər. Onlar tələbələr qarşısında konkret pedaqoji prosesdə layihələrlə çıxış edir, hər bir tələbənin imkan və bacarıqlarını üzə çıxara biləcək tədqiqat layihələrinin hazırlanmasını onların öz ixtiyarına buraxırlar. Çox zaman tədqiqatlarda uğurlu nəticə əldə etmiş tələbə şirkət tərəfindən işlə təmin olu­nur. Təhsil biznesi-pedaqoji biznes bütün dünyada populyarlıq qazanır. Texnologiyanın inkişaf meylləri insanları daim öz bacarıqlarını təkmilləşdirməyə məcbur edir. Təhsil xidmətləri bazarı yeniyetmələr və öz ixti­saslarını artıran mütəxəssislər arasında bərabər bölünür. Artıq yeni qəbul edilmiş "Təhsil haqqında" Azər­baycan Respublikasının Qanununa əsasən təhsil müəssisələrinin qanunvericiliyə uyğun olaraq dövlət büd­cə­si­nin vəsaiti ilə yanaşı, digər mənbələrdən gəlir əldə etmək hüquqları müəyyənləşdirilmişdir. Belə ki, Qa­nu­nun 38-ci maddəsinə əsasən “təhsil müəssisələri qanunvericiliklə müəyyən edilmiş qaydada fiziki və hüquqi şəxslərə müxtəlif ödənişli təhsil xidmətləri göstərmək, sahibkarlıq fəaliyyəti ilə məşğul olmaq, hüquqi və fiziki şəxslərdən ianələr və könüllü yardımlar almaq hüququna malikdir. Bu mənbələrdən əldə olunan vəsait və digər əmlak dövlət təhsil müəssisəsinə büdcədən ayrılan vəsaitlərin miqdarına təsir göstərmir və onun nizamnaməsinə uyğun olaraq sərbəst istifadə edilir”.

Açar sözlər: sahibkarlıq fəaliyyəti, maliyyələşdirmə, təhsil sistemi, təhsil xidmətləri, büdcə